Romans 9
Lataua Ilo'a ta Mitema E Anu Musosovosi'a Lexe Anu ta Na'u Muisalili
1Eni amitema noxou Kalisito, la sou vaivaikala noxilo 'o ne manina, mo akalavoi uasi. Uleenu Tavuna mu'oxonu xavutalaxeni lamana mo no nano no taleli manina eni elavusou lexe vaivaikala noxilo 'o ne manina. 2Utotomu ne eni opoleli utatama mo axolu laixe uasi, xe axavutala tavu'alo manina no nano no talelisinge ngingi ta Iutaia. 3 aEni emasaxa lexe eni axexee noxou Kalisito mo asu'a avile, aloxo ne la sou asu'ulingengi ta vivilo ane nenge nenge'a texali no anu mata vilesisi. 4 bAne'i ta mitema ta Isilaeli, mo ane'i ta mitema e Lataua musosovosi'a lexe anu ta 'olu maninasou. Ane'i mimaisou Lataua xaviinu mo ilo'a Lataua mixalixu opo vilesisi no taine'i la mupitane'i, mo mulosi'a lapuloto noxou sou imulinu, mo mulosie'i 'ilixo sou lalotu xe ilo'a misakiinu vaikala. 5Mo ta xaixasi'a ilo'a ta 'ilusune'i mixali kisou matamata mo no anu mata nesi la Kalisito muxali itema no anu. Mo Kalisito anu Lataua mo mimii latala ne muxolu no anu saxisaxila'u noxou la sou nenge ta'itinu ualasou utotomu mo kaluxu uasi. Manina. 6La sou anu loxo vaikala noxou Lataua musakiinu noxi'a tei 'ole ne uxali mii vitanisi uasi. Xo eni elavusou lexe ta mitema tavu'alo ne mixali no nano noxi'a ta Isilaeli ia ta Isilaeli manina uasi. 7 cLa sou nenge tavikala lexe, xo ane'i mutu'u ovuxa'a mo mixali no anu sialuxu Avalaamu ta 'olu ne, uasi. Tei manina la Lataua muvikala aloxo 'o, “Noxou Aisakisi la sou uxalixa'a ta xaixasine ilo'a ta 'ili'iline.” 8 dLaaxu vaikala ne aloxo 'o, ta molomolo ane mixali no anu sialuxu Avalaamu la ane'i Lataua ta 'olu uasi, ia ane'i ane mixali no anu vaikala e Lataua musakiinu lexe u'oxonu xe no anu loopala la ane'i ino'u uala lexe Avalaamu ta 'olu. 9 eXo vaikala e Lataua musakiinu lexe u'oxonu ne muvikala aloxo 'o, “No anu voxo e eni esosovosou, la eni alivu ane'e. Eni alivu une'e no voxo ne la no anu xavi Uleenu Tavuna la Sala ivo'o 'ilie mulu vile.”10Vaikala ane nesi uasi, ia noxie Liveka kalumo lexe, Liveka ta 'ilie ta tamei ne mami'a vilesisi. Ane'i mami'a vilesisi ne ane Aisaki, anu xasinge ne. 11 fIa Lataua umulinu 'ilixo loxo Anu u'oxonu utotomu sou molu usosovosou itema no anu masaxa noxousi, la uxavutala no anu xaixai noxou itema ne uasi, ia Anu molu u'avalou itema mo usosovosou. Aloxo ne la sou no mine Liveka ivo'one'i ta 'ilie ta mulu tavunaxa'a ta sema ta tamei ne uao, mo ilou ilavusou i'oxonu 'ilixo laixe xe masua uao, la Lataua muvikalane aloxo 'o, “Ulai, la 'iline uxali tei uxolu no laaxu ane kokope.” 13 gAnu aloxo kaukavu muai no nano no anu Lavuku Tavuna noxou Lataua, muvikala aloxo 'o, “Eni esosovosou Iakovo mo aalusou ia Esau ne eni aalusou uasi.”
14La sou nenge tavikala a loxovaa? Lataua mu'oxonu 'ilixo masua? Uasisi manina. 15 hXo Anu muvikalanu Mosesi aloxo 'o, “Lexe eni amasaxa lexe a'oxonu alauna sou itema vile, la eni a'oxonu noxou, mo amasaxa lexe talelixu itema vile, la eni talelixu.” 16 iAloxo ne la sou no anu alauna noxou Lataua, la molu usosovosou itemasi, ia uxali no anu masaxa xe xaixai noxou itemasi uasi. 17 jXo loxo kaukavu muai no nano no anu Lavuku Tavuna teinu noxou Lataua mua'aloxu Lataua sou muvikalanu tatananu tuala ne Axiputo Palao aloxo 'o, “Eni e'oxoneni nexali tatananu tuala sou tava'u aloxo, eni amasaxa lexe amaxa'u xavileli noxine mo sou ta mitema imaisou la ia'aloxu uala tila noxilo no xalee tuatuala no lialia 'o ukalusi.” 18Anu aloxo nesi, la sou nenge telavusou aloxo ne, lexe Lataua umasaxa ualauna sou itema vile, la anu ualaunasou xe umasaxa utatusou itema vile xavutalau pekia'u la anu utatusou.
19La sou vile noxinge uavuti la uvikalaleli aloxo 'o, “Lexe Lataua u'oxonu aloxo ne, ia loxovaa la sou Anu u'oxo lexe nenge tesusu 'o? 'Ena'ei umomomo sou umulinu masaxa noxousi ia ulomu no anu masaxa noxou Lataua uasi?” 20 kIa nini namitema a loxovaa la sou namomomo sou nalavixu Lataua no anu 'ilixo e Anu mu'oxonu ne? Loxovaa umomomo sou lasopeni e i'oxonu no anu pilika ne umomomo sou upupuiou itema e u'oxonu ne, la uvikala lexe, “Ae loxovaa la sou nini ne'oxoleli loxo 'o?” 21 lItema e u'oxonu lasopeni ne, anu molu u'oxonu no anu masaxa noxou. Anu umasaxa ukapikapi pilika lavo'onu vilesisi ia u'oxonu lasopeni ta tamei no anu, la anu umomomo. Vile sou xaixai ta tatila xe vile sou ixaxai no anusi. Ia aloxo ne la loxovaa umomomo uasi?
22Lataua ulavusou u'oxonu aloxo ne kalumo. Anu umasaxa lexe uxalixu la'ia noxou uxali lamana mo ta mitema latala imaisou la ilavusou lexe Lataua anu xaviinu musuku. Lasolasopeni e mulalaxii sou Anu umamulonu ne, a muta'olu mulalaxii mukalu, ia Anu umamulonu palea uasi muxolu maxuveni. Ia lexe Anu u'oxonu aloxo ne la a loxovaa? 23Mo Anu umasaxa kalumo lexe umaxa'u xaviinu ne uxali lamana mo xoluxolu lailaixe manina e Anu mulalaxiinu tei sou ulosi'a ta lasolasopeni ne sou ixolu no nano no alauna noxou. Anu mulalaxiinu lasolasopeni ne tei manina sou ulosi'a uala tila xe ino'u xoluxolu laixe. 24Mo ta lasolasopeni e sou ixolu no anu alauna noxou ne ane nenge ta mitema e Anu mu'avalinge. No anu mata noxi'a ta Iutaiasi uasi, ia noxi'a ane'i ane Iutaia uasi kalumo. 25 mAloxo Anu mulemolu no anu lavuku noxou Osea muvikala aloxo 'o.
“Ta mitema e tei la eni amoxo'a lexe ta mitema noxilo uasi ne,
eni amoxo'a lexe ta mitema noxilo.
Mo ane'i ane eni talelixa'a uasi ne, ili'i la eni talelixa'a.
26 nMo no xalee lia e eni evikalane'i lexe, ‘ngingi ta mitema noxilo uasi’ ne,
no anu xalee lia vilesisi ane ne, la eni avikalane'i lexe,
ngingi Lataua e umauli utotomu mo xaviinu misevile ta 'olu.”
27 oMo Aisaia muxavutala noxi'a ta Isilaeli la muvikala aloxo 'o,
“Manina lexe ta Isilaeli ixali tavu'alo loxo io'i no tasi'i,
ia tata'eisi ane Tila upamauline'i.
28Xo Tila mutilovosi'a ta mitema no lia 'o mukalu,
la sou Anu umomomo sou uvovoxo uasi,
upasipaanu voxo ne une'e ataxusi sou utulusi'a ta mitema no lia 'o ukalusi no anu vaivaikala.”
29 pMimii ne uxali aloxo Aisaia mulemolu tei. Anu muvikala aloxo 'o,
“Lexe Tila xaviinu musuku usalasi'a ta xaixasinge se'i ixolu tei uasi,
la nenge takalu kalumo loxo ta Sodomu ilo'a ta Xomola.”
Ta Isilaeli Imuxaxu Tane'i Uasi
30La sou nenge tavikala a loxovaa? Nenge tavikala lexe ane'i ane Iutaia uasi ne i'oxonu xaixai vile sou ixali ta mitema ilapu uasi, ia ane'i mixali ta mitema milapu no iou xo ane'i mimuxaxu tane'i noxou. 31Ia ta Isilaeli e xavixavine'i sou imulimulinu lapuloto sou lexe ixali ta mitema ilapu ne ixali ta mitema ilapu no iou Lataua uasi. 32 qTava'u loxovaa la sou ane'i ixali ta mitema ilapu ua ne? Xo ane'i imuxaxu tane'i uasi. Ane'i mikalavoi lexe no anu xaixaisi, la ane'i ixali ta mitema ilapu no iou Lataua. Ane'i mitulaki la milapu no anu kulu sou itulaki no anu. 33 rAloxo kaukavu muai no nano no anu Lavuku Tavuna teinu noxou Lataua, muvikala aloxo 'o,“Ngalomu, Eni emuxaxu kulu vile a muai no laxa'ilu ne Ielusalemu,
sou u'oxone'i ta mitema itulakisou la ilapau.
Ia ane'i ane imuxaxu tane'i no anu la imomomo sou iulu'a uasi.”
Copyright information for
ATA